Pozez txoratzen iragartzen dizuegu gure produktu berria, oso kopuru mugatuan ekoitzi duguna, lehen aldia delakoz. Sareko Bordaren ezti propoliaduna testura krematsua duen milalore ezti leun bat da, propoli tintura %1 inguruan gehitua duena. Propoliaren mikaztasunarekin konbinatuta, oso zapore orekatua du. Saldiasko ezti propoliaduna elikagai natural bat da, osasunerako onura handiak dakartzana; ez da ezti arrunta bezain erraz ekoizten, eta horregatik eta dakartzan onurengatik, egunerokoan hartzeko baino gehiago gomendatzen dugu noizbehinka hartzeko.

Nafarroako ikurrak izaten ari diren arrakasta ikusirik, eginahal handiagoa egiten ari gara atal hau indartzeko. Horren erakusgarri azkena gaineratu dugun elastikoa.

Lagundu Nafarren Biltzarra ospatzen. Ikusi gure kotoizko kamiseta eskaintza berria. Kamiseta honen salmentarekin bildutako dirua 2025eko Nafarren Biltzarra ospakizunen ekitaldiak antolatzeko erabiliko da osorik. Elkartu foroak eta Orreaga fundazioak antolatzen dute.

Usurbilen, urtero egiten dute Euskal Herriko ezti txapelketa Erle Egunean, eta aurten Sareko Bordak bigarren saria irabazi du ezti argien atalean. Hemen duzue 23. Erle Egunaren gainean Noaua aldizkariak egindako kronika. Saritutako eztia Saldiasen atera genuen uztailean: milalore argi bat da, ziurrenera akazia ukitua duena soroetako loreekin batera. Zapore leunekoa da, eta kristal finak ditu. Esan gabe doa poz handiarekin hartu dugula saria, eta hemendik laster bereizgarri batekin nabarmenduko ditugu gure eztiak, beren-beregi sortutako zigilu honekin hain zuzen:

Olatz Zugastik iradokitzen duen bezala, herri baten izatea bere historian ardazten da, eta zer esanik ez haren ikurrak. Euskal Herriak jarraitzen du bere nafartasuna aldarrikatzen, eta Sareko Bordak ez du alderdi horretan atzean gelditu nahi. Ikurrei zor zaien garrantziaren jakitun, besterenduak izateko duten arriskua ikusirik, horiek ere defendatu eta aldarrikatu beharra ikusten dugu. Hori dela bide, Nafarroaren armarria dakarten bi modelotako elastiko dotoreak erantsi ditugu gure katalogoan, hainbat neurritan. Eta, marketinaren legeak bestela egiteko esaten badu ere, hona hemen gure webgunetik aterako zaituen kantu zoragarria: Oi, Amaiur.    

Oparitarako ideiak emateko gaude webgune honetan, eta hona aldi honetako proposamena. Eztizalea izan beharrik ere ez, aski da oparia hartuko duena gozozalea izatea. Zur eta lur utziko duzu akaziaren ezti honekin. Bortzerrietako akazia arboletatik erleek egina beren izerdiarekin (erlezainak ere bota ditu tanto batzuk…).

Sareko Bordak aurten ere bildu du bere ezti uztatxoa, nahiz eta ez nahi adinakoa izan. Erlezaintzaren mundu miragarria hor dago, deskubritu nahi duenarentzat, baina gaurko egunean zaila da lantegi honen aldeko hitz erromantikorik jaulkitzea. Erleari bizirik eusteak berak lan du uzta biltzetik aparte. Oraintxe, Asiako liztorraren erasoaldi latza pairatzen ari dira erlauntzetan, eta erasoaldi hori areagotu baino ez da egingo azaroan aurreneko izotzaldiak iritsi bitarte. Gaiaz gehiago jakin nahi duenak, irakur beza Ipar Euskal Herriko hitza astekariko orri hau: https://iparraldekohitza.eus/2018/03/22/erleen-alde-lan-egiteko-garaia/.

Haur txikientzako osagarrien atala sukaldaritzako mantal honekin abiatu genuen, eta hura da atal horretako elementu izarra oraindik ere! Geroztik, eskaintza dexente zabaldu dugu, eta ez dugu aukera hau desaprobetxatu nahi haur txikien atal honek (oraingoz, behintzat) dituen hiru berezitasunak nabarmentzeko: 1. Eskuz eginak dira, 2. Sareko Bordak berak eginak dira eta 3. Bakoitzetik ale bakarra dago mundu osoan!! Zer gehiago behar duzu haur horrentzako oparia berezia izan dadin?

Iritsi da udazken honetarako proposatzen dugun opari kutxa. Muselinazko manta arin-arin batek eta katilu batek osatzen dute. Muselina bi metrokoa da, sofan bi lagunek lo kuluxka politak egiteko modukoa. Aurrera doa Sareko Borda, eta pixkanaka forma hartzen ari da proiektua. Edozein iradokizun duzula, idatziguzu lasai ederrean, entzuteko irrikaz gaude!